兩年沒出廣東碟接受傳媒專訪的Eason，昨駕臨蘋果fb做「問診大會」，他坦言：「好耐冇嚟蘋果，其實好期待，所以有啲緊張。」
Timmy Wong：醫神，塞車時候你會唔會轉搭其他交通工具？
Eason：我不嬲都搭交通工具㗎喎，塞緊的士咪搭地鐵囉。
雪兒陳：你成日唱歌，咁自己聽開乜嘢歌多？如果完全唔使理市場，最想試吓唱乜類型嘅歌？
Eason：我上年開始聽多咗好多內地樂隊，逃跑計劃啦；本地嘅雞蛋蒸肉餅啦，小塵埃、my little airport都一直聽開，英國嘅Blur等等，我亦鍾意聽jazz。
李浩賢：Eason哥，究竟唱你邊首歌先可以媾到女？
Eason：有一隻我冇plug過嘅歌：99年《幸福》嗰隻碟，《快高長大》，你要喺對方耳邊唱。
Sze Sze Chow：你就快要上《萬眾同心公益金》，心情係咪好興奮？可唔可以形容吓？
Eason：都幾㗎其實！好耐冇去過電視城。感覺新鮮。驚撻Q㖭。
Karen Fong：答以下其中一條都得，謝謝蘋果！
1. 你事業已經有咁高成就，那你以下的目標是甚麼？特別在現在樂壇的狀況。
2. 你發現你將會做爸爸時心裏係乜感覺？
Eason：你好有禮貌，事業成就高度，視乎你自己點睇。之前做咗好多live show，休息咗一段時間，做過25場，我覺得自己可以做到30幾。後來再去澳洲泰國，反而開始覺得攰，而且個show未必做到我最想做嘅效果。唔係得到幾多成就就夠，而係若果做完有滿足感，反而會想繼續，觀眾嘅反應亦令我想繼續。美術嘅嘢，一定要好。
Thethe Wa：聞說你開咗製作公司，請唔請人呢？
Eason：請你做乜先Thethe Wa。
Apple Hang：Eason會考慮發行精選黑膠唱片、CD、etc thx！
Eason：會，希望唔同聽眾都得到鍾意嘅嘢。
Tsang Po Yi：你去開邊頭食飯？lol，想搵吓你吹水。
Eason：我平時唔講嘢㗎喎。
Mark Yeung：表演太緊張時，你會有乜方法令自己冇咁緊張？
Eason：定啲嚟先，定定神，唔好怕dead air。
Chet Lam：Are you happy？
Eason：呢句雖然好似好簡單，但happy呢樣嘢……或者咁講，若果我答完呢條問題就釘蓋，我人生都係happy。我當然係happy，但心裏面都唔會永遠滿足。例如我唱隻《無條件》，又會有啲欷歔感覺。做呢一行，永遠唔飽。
Cheung Yan Yan：Eason有沒有跟阿徐跑馬拉松？
Eason：我係唔跑步嘅，噚日佢先跑完43km，環島，真係好勁。就算踩單車我都要諗諗。
Chan Kelvin：可唔可以快啲戒煙？
Eason：成日掛喺口邊嘅嘢，反而唔會做。
Kelvin Yung Pak Yu：阿臣，有冇諗過有乜方法可以叫人唔好再喺你concert入面亂叫？
Eason：唔使咁緊張或認真，搞到自己咁神經衰弱，我控制唔到人哋叫，唔通賣飛時叫《陳奕迅叫你唔准叫演唱會》咩！
Kaka Ng Eason：幾時開talk show？
Eason：唔好啦啩？我開talk show？有同林海峰傾過，我唱歌，林負責講。但佢要對我好有信心。
Ken Lin：Eason，幾時出廣東大碟？
Eason：7月，準備就緒。
Cyrus Wong：Eason，有冇諗過出全英文專輯？
Eason：其實有。我再問吓唱片公司。
Acantha Lee Hi：醫神，你好呀！
1.你覺得林子琦（台灣舉重女選手）同你似樣嗎？
2. 只選一個，你會花錢買以下邊個演唱會飛（assume佢哋冇畀飛你）A. 李克勤 B. G.E.M. C. 韓紅 D. 陳奕迅。
Eason：1.似！佢勁好多，我放唔到條嘢喺頸度。佢個表情都唔易做。
2.佢哋嘅飛，我個個都唔使買㗎喎，直接搵佢就得。但調番轉，如果李克勤買我嘅飛，我就覺得好榮幸。
Jane Chow：Eason，幾時先開華星三寶演唱會或者合作拍電影？
Eason：真係問得好！諗緊。想睇埋《華麗上班族》成績先再算。
