今年是黃家駒逝世22周年，葉世榮日前承認正向紅館查詢檔期，打算拉攏近年頻爆罵戰的黃家強及黃貫中將Beyond合體，舉行慈善演唱會紀念家駒。世榮更表示有信心二人會答應，惟家強在昨日凌晨新城節目《寂寞留聲群》播出的訪問，卻斷言說：「冇可能！」
家強說：「其實一直覺得只要大家忍讓下，係可以繼續做Beyond，冇必要𢱑爛塊臉，冇得返轉頭，呢個唔係我心目中嘅結果，但好多嘢唔係我一個人可以話咁就咁，到後來不擇手段，去到聯手攻擊我，去到呢一步，咁仲點Beyond呢？容忍有限度，唔出聲唔講，都唔肯放過我，逼到去懸崖，將所有嘢講出嚟，去到呢個位，你覺得仲有得掹咩？都逼到爆晒出嚟喇！」
「希望歌迷理解」
談到哥哥家駒，家強嘆謂：「問心，佢唔喺度都冇乜嘢意思，如果佢喺度，我諗我會用心好多。」他又希望歌迷理解他的決定，他更直言：「Beyond已經緣盡㗎喇！」
對於家強的表態，世榮昨在電話中說：「我會返嚟同家強傾，我暫時冇聽到佢咁講，你哋啱啱講先知。」如果家強拒絕合體會否失望？世榮說：「咁一定會，但係佢可能未聽我個plan啫！本來係蘋果啲人講到係西瓜，所以佢有咁嘅諗法，可能聽完我講會有唔同諗法，我會返嚟香港再了解。」
採訪：小米
