民建聯趁住港股進入大時代，喺4月底訪問600幾位市民，了解佢哋點睇，噚日由主席李慧琼拍住兩個黨友包括陳仲翔召開記者會公佈結果，原來近四成受訪者認為港股已經「瘋狂」，近三成七受訪者仲預計5、6月恒指會上升。
查實做得呢個調查，擺明係想抽丁蟹《大時代》嘅水，陳仲翔仲學埋丁蟹一不做、二不休，早前膽粗粗打去無綫電視搵秋官，想邀請丁蟹現身噚日嘅記者會，結果呢番「奇招」竟然獲得蟹嫂官晶華覆電。陳仲翔引述對方話，秋官因為事忙未能出席，但歡迎佢哋畀個民調結果秋官睇吓；當發現八成幾受訪者都話知道乜嘢係「秋官效應」，「佢都哈哈大笑」。陳仲翔話呀，想請丁蟹無非係想搞啲gimmick，旨在提醒港人唔好炒股炒到癲至好呀。