日本女團AKB48不嬲多是非，估唔到聽日上架嘅第40張單曲都無啦啦捲入政治風波。由AKB新寵島崎遙香擔任主唱嘅《我們不戰鬥》，咪睇歌名就以為係反戰歌曲，查實負責填詞嘅AKB之父秋元康同首相安倍晉三私交甚篤，有業界人士就踢爆首歌只係唱緊反話，單睇MV就已暗藏開戰意識，心水清嘅話唔難發現MV中扮敵人嘅黑衣人，個個都被打到落花流水，擺明係撐緊安倍嘅軍國主義。
島崎上年曾登上日本自衞隊刊物《MAMOR》封面，佢最近受訪仲話有留意伊斯蘭國嘅新聞，伊斯蘭國殺害日本人質，一直被指對安倍解禁集體自衞權有利，係咪真心反戰只有島崎先知。島崎呢期成為新聞人物，另一主將柏木由紀都趁人氣總選前積極造勢，仲拋胸為同一雜誌第15次做封面女郎㖭！
撰文：李村姑