成日想去旅行又冇錢？費清都係。𠵱家有個機會，收到風，旅遊網站Expedia聽日會喺港鐵站貼出巨型海報，入面印滿酒店同航空公司英文名，第一個抄低晒、並以.doc或.txt檔上載去指定網站，就可以贏得15萬港元旅行套票信用額，一年任去旅行！
巨型海報（圖）會貼喺港鐵銅鑼灣站（崇光大堂、F出口及恒生銀行附近）同旺角站（大堂及C出口），聽講有成1萬個名。
可能大家聽朝會一早衝入港鐵站，啟動一雙摩打手瘋狂輸入資料。費清同大家計過，如果你每分鐘可以打60個字，以國泰航空「Cathay Pacific Airways」為例（嗱，費清唔知有冇國泰㗎），個名有3個字，不眠不休咁打，大約要8個幾鐘先可以打晒一萬個名。8個鐘好耐？但將15萬獎金除開，時薪都成1萬8蚊㗎。
費清諗最好影低張海報，返屋企慢慢打；有軟件可以識別相中嘅文字，但張海報嘅名又打橫又打斜，睇怕都未必認到。詳情留意聽日海報啦！
費清
＃要生計，也要生活 ＃毋忘初衷