幾個月嚟，有不少社會知名人士逝世，左丁山長輩朋友逝世，校友逝世，甚至年輕到三四十歲嘅朋友之朋友逝世，呢類事情雖然見慣亦平常，人生誰無死，但見到一位朋友之朋友，本活潑好動，勤力工作，直至佢嘅上司發現佢頸部似有小球如波子大小，暗感不安，捉佢入院檢查，先至發覺係惡性瘤，已達末期，三個月之內便告去世，留下妻兒女四人，頓感人生無常。
近日勞永樂醫生之逝世，引起朋友傳來網上（台灣）文章，大意云作者同學太太逝世，丈夫整理太太遺物，在衣櫃內發現一條夫婦兩人旅遊紐約時在名店買入嘅絲巾，價錢牌仍掛在絲巾上，價錢好貴，太太生前一直冇用，話要等到一個特殊日子先至捨得掛上。可是太太沒有了，絲巾仍在，未用過，於是丈夫醒覺起：「再也不要把好東西留到特別的日子才用，你活着的每一天都是特別的日子。」呢句話好啱聽，不過銀紙除外，銀紙總要留着部份作投資用途，今天用清光的話，明天乞米乎？
大編輯老友記之細佬，長駐國內城市工作，前星期覺得心絞痛，心知不妙，火速買機票回港就醫，阿哥早一日已為佢搵私家醫院（有醫療保險），點知到處掛上「全院滿座」，一病床難求，阿哥唯有在機場接到細佬之後，飛車送佢入沙田威爾斯醫院急症室，初步醫治後，知無性命危險，醫生叫細佬照核磁共振（MRI），到仁安醫院要排期兩星期後，急亦急唔嚟，大編輯知道後，不禁慨然而嘆：「林奮強嘅黃金五十做過研究報告，話香港人口老化，而回歸後未有一間大型醫院起得成，香港人勢將死得唔好病。」香港點解唔夠醫院，私立唔夠，公家又唔夠？皆因缺地皮，有地皮嘅話又俾梁振英政府挪用去起公屋，好似公屋居民係鐵打嘅，有公屋住就唔會病咁款。若問醫務高官，佢地會話起醫院都冇用，香港唔夠醫生，唔夠護士。咁「黃金五十」倡議輸入醫生呢？唉，此乃禁區，唔講得。喂，新加坡又得，梁振英崇拜李光耀，點解唔效法新加坡咁，每年大開門戶輸入醫生呀？中大港大醫科畢業生可到新加坡行醫，點解新加坡大學醫科畢業生唔嚟得香港？道理一字咁淺，大家都明白。前幾日見到林奮強，佢話雖然明知阻力巨大，仍然會繼續推動起新醫院與輸入醫生喎！