港視劇《導火新聞線》以報館搶新聞為題材，內容夠寫實，早前播出時口碑不錯，劇中演員梁小冰、周家怡和男神王宗堯等都發揮得淋漓盡致。劇集結局時總編「皇阿媽」梁小冰生死未卜、「輝爺」王宗堯大揭富豪底牌惹禍，全部埋下伏線，電影公司老闆蕭定一睇中《導》劇，希望延續故事拍成電影版，所有疑團將在大銀幕中解開。蕭定一預計今年9月開拍《導》劇電影版，並與港視合作，準備斥資1,500萬，除起用《導》劇台前幕後原班人馬，還想加入他旗下猛將張智霖（Chilam）和周秀娜助陣。
揭皇阿媽生死之謎
蕭定一日前剛與港視揸弗人王維基簽訂合約，將共同開拍《導》劇電影版，蕭定一昨日在電話中說：「部戲一定要用番原本編審潘漫紅，佢係主要靈魂人物，好了解角色脈絡發展，其次原班人馬都好重要。」電影版必須加插新元素，才能令觀眾有新鮮感，蕭定一說：「大結局觀眾最想知梁小冰飾演嘅『皇阿媽』到底生定死，而駱應鈞演嘅丁駿生同曾啟綸演嘅廖秉勛，佢哋係會聯手將王宗堯整鑊甘，謎團逐一喺戲裏邊搵到答案。」
王宗堯聞娜姐醒神
據知王宗堯除被仇家搞到周身蟻，他與演阿咩的楊淇感情亦會現危機，有指周秀娜會是他們的小三，蕭定一說：「我係有咁諗過，娜姐咁索，佢出現先有威脅性。」至於Chilam會定位演甚麼角色？蕭定一說：「好多細節仲待定，我要同潘漫紅仔細商量吓。」王宗堯昨獲悉《導》片中有娜姐演小三，他說：「吓，劇集最後先交代我同楊淇啱啱開始，咁快有第三者？如果係娜姐都唔錯，咁益我，立即醒神晒，相信我哋會有火花。」娜姐昨也說：「我有留意《導》劇，我最希望有機會扮演新聞工作者，至於同王宗堯感情線，只要有發揮都OK。」
採訪：比華利