「快艇始終係快艇。」周日西岸準決賽Game 7決戰，作客嘅快艇以100:113輸畀火箭，總場數3:4黯然出局，湖人名宿「魔術手」莊遜就寸爆呢隊同市死敵。繼1997年再入西岸決賽嘅火箭，馬不停蹄周二就要鬥勇士。（now635台明日9:00am直播）
上場喺主場領先19分都輸番轉頭，唔少人睇死快艇會繼續衰落去。「不敗拳王」美韋達就用咗10萬美金，買火箭呢場至少贏五分，結果贏咗成九萬美金。曾經效力湖人多年嘅魔術手亦乘機抽水：「我仲以為，馬刺喺打足七場嘅高難度系列賽（首圈），已經教曉快艇點贏波。我錯嘞，快艇始終係快艇。」
唞一日即硬撼勇士
各界瘋狂抽水，但快艇嘅30歲明星控衞基斯保羅（Chris Paul、CP3）認真慘情，個人第七年打季後賽都仲未破到宿命，又一次同岸區決賽擦肩而過。尾段用犯規戰術要foul比自己高接近一呎嘅懷特侯活（Dwight Howard），睇住佢為免「故意犯規」，要扮搶籃板成個人騎上對方背脊咁滯，好笑之餘都幾心噏。CP3輸波拒絕自我安慰，引用電影角色Ricky Bobby名句：「如果你攞唔到第一，就等如包尾；幾接近都好，始終都係未夠好。」
至於成為史上第九隊先落後1:3而成功反勝晉級嘅火箭，休息一日就要再搏殺，周二作客勇士。電視台已經公佈直播安排，東、西岸決賽嘅所有場次都會有直播睇，香港球迷可以一場不漏欣賞全部大戰。
