雖然羅康瑞下月1號先正式過貿發局做主席，但佢已被安排好緊密嘅行程，佢6月7號就要起行飛去加拿大多倫多與美國芝加哥，事關呢個又係貿發局一年一度喺美加舉行大型推廣活動嘅檔期。時間咁緊迫，羅康瑞當然冇空檔休息喇。
根據貿發局網頁資料，貿發局今年呢個美加推廣活動名為「Think Asia,Think Hong Kong」，8號喺多倫多、10號喺芝加哥舉行，特首梁振英兩場都會出席，畀足面本身係「梁粉」嘅羅康瑞。
做貿發局主席應該唔輕鬆，羅康瑞本身有兩間上市公司瑞房（272）與瑞安建業（983），點兼顧呢？佢唯有瞓少啲囉，前晚就半夜4點先有得瞓！認真陰功豬。