年底嘅新一屆區議會選舉會取消委任區議員。政府委任得，當然都係建制中人，𠵱家60幾個委任議員中，好多都打正旗號屬建制政黨。一旦取消，有啲建制派政團都好傷㗎，當然唔包括全港最大黨嘅民建聯，事關佢哋有成132個區議員，撇除約10個多啲委任議席，仲有大把剩，但近年冒起嘅阿爺愛將經民聯，幾乎五分一區議員議席都係委任，一定好肉痛。
經民聯原本有23個區議員，但早前鄉委會換屆，本身係大埔鄉委會主席嘅文春輝輸咗畀民建聯張學明，變相冇得做當然議員；其餘5個委任議員，如果唔可以好似新界王劉皇發咁，冇得做委任議員嘞喎，仲可以透過做屯門鄉委會主席，繼續以當然議員身份入區議會嘅話，就要變陣轉戰直選。
保住區會主席亦少一席
花生友聽聞，經民聯嘅委任議員包括現任葵青區議會主席方平同元朗區嘅莊健成等，打算喺直選披甲。方平積極考慮選青衣安灝區，呢區現任議員係經民聯譚惠珍。其實要咁部署，一大考慮係葵青區議會係少數建制派冇壓倒勝議席，所以佢哋寧願保住壓得住場嘅方平，等佢有機會冧莊主席，換言之即使佢當選、保得住區會主席個位，經民聯照樣少一席。
至於其他建制政黨，取消區議會委任制對佢哋影響真係不大，工聯會34個區議員中，只得兩個委任議員；建制「壞孩子」自由黨就仲少，得1個。
花生友