利世民沒說錯，政府和企業至今對新媒體仍是有點不知所措，即係知啲唔知啲，最普遍的情況是，不是不知道新媒體的存在和可能爆發力，但對於如何才可以準確掌握新媒體言論走勢，如何能零風險地利用新媒體，實在還是一籌莫展。
利世民也很準確地指出，今之企業傳訊阿頭，大都四十開外，四十開外，應該不算很頑固，未必唔肯改，麻煩的是他們的老闆。
這些主席或CEO，一般五十開外，有些真的徹底old school，不管香港已改朝換代，報館亦已物是人非，至今奉鬼報一號和老牌財經報為至高無上新聞來源，他們對新媒體的敬而遠之，不難想像。
另外一些剛好相反，自以為好update兼夠潮，睇埋晒啲番文商管讀物，有理論無實際，開口埋囗都叫下屬善用社交媒體，自己卻連高登都未上過，但又一味叫公關做網上言論報告，喂，點報告你聽好呢？粗囗報唔報？
唔同全港報紙得嗰十幾份，網上言論，浩瀚如大洋大洲，嘆香江至今未出現有效、有公信力的網上輿論監察服務，現行最流行那些，幫襯了，數據是有了，還回來得做大量人肉篩選分析，一句「至乜醒係你！」到底讚定彈先？都要處理下吧，但話明網上輿論，唔通可以慢慢做，網上一粒鐘，足夠危機醞釀兼爆發，你話唔請班人全天候mon住，點真正發揮作用？不過，講到錢，老闆忽然又會冇咁潮喇，這個，你懂的。
這還只是monitor，即守的那部份，攻呢？如何攻，就算你有一隊九十後精兵，你真的放心做打手，毋須請示就帖文？
也許有人不相信，但在今之企業，一份新聞稿，真係仲係改來改去，改到version一十九㗎！
彭瑪莉
mailto:[email protected]