1981年喺理大前身嘅理工學院紡織及製衣學系畢業嘅工業界立法會議員林大輝，卅幾年後喺母校好威威，有個廣場以佢命名。噚日理大舉行「林大輝廣場」命名典禮，一向人面廣嘅大輝請到署理特首林鄭月娥主禮，立法會議員左、中、右都畀面撐場，就連理大校長唐偉章致詞時都尊稱佢一聲「大輝哥」，大讚佢對理大貢獻多。
唐偉章話呢個廣場係每位學生畢業典禮時影相嘅地方，意義非凡；雖然噚日揭幕儀式期間有理大學生到場示威要求「公民提名」，大輝好阿Q咁話，留意到揭幕嗰十幾秒學生停咗冇喊口號，可能係尊重佢呢位「師兄」。
政商界猛人出席唔出奇，但八方發現連「歡喜哥」許紹雄都嚟咗，原來佢哋識咗十幾廿年，係當年喺視藝會認識，老友鬼鬼。