講起財爺曾俊華，自從上月初港股進入大時代之後，除咗一班股評人好唔得閒，財爺亦變得十分貼市，兩個月內4次公開評論股市。財爺呢兩個月應該刨咗好多股市資訊，否則點敢成日講呢？
上月復活節長假後，港股爆升，財爺走出嚟話股市有基本因素支持。個市真係升到，大台都話要重播《大時代》贈興，丁蟹一出，財爺就喺4月19號出網誌，預期丁蟹效應可能拖累港股翌日「裂口低開」，點知當晚人行降準放水，翌日港股先升後回，裂口低開冇出現到。
財爺之後繼續講股，本月5日，佢喺立法會話，若果政改通過唔到，唔排除股市會應聲下跌，因經濟與政治密不可分。
噚日佢出席論壇就講阿媽係女人之類，指股市已經累積一定升幅，調整只係遲早嘅事，叫大家小心風險，希望股民「出入平安」咁話。