馬雲旗下阿里巴巴明日喺杭州舉行「全球女性創業者大會」，馬雲做壓軸演講嘉賓外，佢哋亦請咗一班喺全球都好有影響力嘅女強人演講，包括阿里首席人力資源官彭蕾、滴滴快的總裁柳青、雅虎首席發展官兼阿里執董Jacqueline Reses等猛人，仲有國際影星章子怡。
不過，據阿里最新嘅嘉賓名單，華華發現唔見咗章子怡，唔知佢係咪忙住同汪峰嘅婚事呢？不過唔緊要，馬雲搵咗佢老友趙薇頂上。趙薇之前入股馬雲旗下阿里影業（1060），短短幾個月就可以減持套現10億元，家陣幫幫手唔會say no啩，唔知馬雲會否公開問趙薇點解減持阿里影業呢？