內地股民鍾意炒中小股，連帶本港細價股化身「港A股」，一路炒唔完。要明白內地同胞口味，就要多上內地財經網站，睇人哋點炒港股。內地而家最紅網站有「雪球網」及「格隆匯」，雲集大堆於港股搵食嘅內地股民，相當有啟示。
4月初港股大時代啟動時，上述網站就流傳一份「上海灘港股私募圈聯合研究備戰萬字紀要」，似模似樣，有會議時間地點，出席人士包括多位私募分析師，仲有港澳同胞代表。會上推薦40隻港股，包括金山軟件（3888）、網龍（777）等，呢一個月來，多數贏到開巷。呢份會議紀要真假難知，但就印證北水影響力。其實內地股壇藏龍卧虎高手都好多，唔少人有長期投資港股經驗。如雪球網上有好幾篇文章分析香港老千股，分析相當深入，一啲都唔可以睇小。
黃尹華