澳職季後賽噚日上演終極對決，由常規賽一哥墨爾本勝利（圖）火併二哥FC悉尼。勝利季尾越戰越勇，而且火力十足，加上決賽有主場之利，賽前被一致睇好可以封王。結果佢哋都冇令球迷失望，比賽到33分鐘，今季由布里斯班獅吼過檔嘅射手貝利沙就幫球隊先開紀錄，亦射入佢今季喺勝利嘅第15球，半場勝利領先1:0。
勝利炒悉尼做雙冠王
下半場雙方一度拉成均勢，踢到83分鐘，勝利由箭頭巴巴路西斯建功，幫球隊贏到2:0，鎖定勝局。雖然勝利之後有中場卡爾華拿里兩黃一紅被逐，不過到補時階段，再有中場布洛斯咸入波錦上添花，最終勝利大勝3:0封王，兼成為今季「雙料冠軍」，亦係繼08/09球季之後，再度於季後賽稱霸。
而喺賽後就發生咗一段小插曲，84歲嘅澳洲足總主席法蘭路維，準備頒獎嗰陣一時失足跌咗落頒獎台下面（左圖），好彩呢位老人家就冇受傷，只係虛驚一場。
識睇，一定係睇足英台【英波Live】：
http://soccer.appledaily.com
http://bit.ly/engballlive