食物及衞生局局長高永文早前落區爆seed宣傳政改令民望急跌，已經喺唔同場合解釋過點解情緒失控嘅民望高，噚日接受民建聯立法會議員蔣麗芸嘅網台節目訪問再解畫，強調已準備好面對唔同政見人士，但當時對方話佢誤導小朋友就「唔可以接受」，「根本（佢）冇聽到我同小朋友對話嘅內容」。
高：其實我唔係想咁
民望高強調，該名令佢激動嘅市民更質疑1,200名提委嘅代表性，甚至用侮辱性形容詞，形容兩名可能被提名做特首嘅候選人，「我當然唔同意，亦都唔可以唔出聲」。
可能都係爆開seed，元秋望住民望高大讚佢呢次舉動「幾man呀」，又引述朋友話：「覺得咁樣先係一個局長，好有性格，好有真性情」，但民望高卻苦笑稱：「其實我唔係想咁」。咁又係，邊個想民望跌吖。
民望高話呀，事後收到好多較嚴厲嘅批評，以後都會嘗試用較溫和嘅語調，爭取辯論空間，但至於成唔成功，就要試過先知道嘞。全國人大常委范徐麗泰都讚過民望高係性情中人兼非一般政客，似乎民望高都好有女人緣喎。