持有多個豪宅物業嘅白韻琹繼續掃貨，噚日斥資超過1,000萬元買入跑馬地新盤壹鑾一個兩房單位，不過登記嗰時，白姐姐就俾太熱情嘅發展商高層嚇親，喺傳媒面前大嗌「你係邊位呀？」似足周星馳《逃學威龍3》入面嘅經典場面。
噚日下午1點半左右，白姐姐喺壹鑾售樓處現身登記抽籤，同傳媒朋友傾緊偈嗰時，發展商之一嘅永光地產總經理鄺德權（Alan）突然從白姐姐身後出現，佢堆滿笑容、豎起兩隻拇指，祝白姐姐抽到前籌，點知白姐姐即刻瞪大雙眼、由上到下掃咗Alan一轉，之後就好似《逃學威龍3》入面經常失憶嘅曾sir曾近榮，對住星爺話「你係邊位呀？」經介紹後，兩人笑住嚟個合照，Alan繼而冇乜癮行開，由得白姐姐繼續接受傳媒訪問。
另外，傳聞數碼通（315）總裁黎大鈞都買咗兩伙，佢早排決定做到今年8月就離開數碼通，如果真係拎過千萬掃豪宅，唔通搵到好路數？