其實民意呢家嘢，有升有跌真係好正常，所以3間大學嘅滾動民調，一度顯示當袋住先民調喺之前創新低，查實都唔令人意外嘅。花生友都同官場中人傾過，佢哋至今都仲好有信心，撐袋住先嘅民意係多啲，但當然不忘補充一句：如果啲建制派戰友，唔搞咁多大鑊嘢出嚟嘅話。
當坊間大彈高官「堅離地」落區流失支持袋住先嘅民意、高永文爆seed搞到自己甚至拖累政改嘅支持度之時，有官場中人話，呢啲都未必係重點，反而官員以外嘅建制派盟友有乜表現，先至係關鍵。
搞細路搞出大頭佛
好似廣西社團總會擅自將學生參加美國交流團面試片段放上網，疑似借此營造年輕人都撐袋住先嘅民意咁吖，據聞官場都媽聲四起，事關細路仔向來都係禁忌，「係人都知，千搞萬搞都唔可以搞細路仔㗎啦」，最終搞出大頭佛，據聞唔少官場中人估緊，到底呢單嘢會令支持政改嘅民意跌多幾多點？
仲有周融搞嗰壇簽名運動都一樣。呢位官場中人笑住話，幫手坐counter搵簽名嘅工作人員，點解個個都係阿叔同大嬸？乜冇啲年輕啲有吸引力啲嘅義工咩？而簽名派花派豉油等等，更加令人將撐政改同蛇齋餅糭等掛鈎，外人睇嚟難免覺得唔係真心支持政改。
之不過呢，雖然係對建制盟友嘅「幫倒忙」行動嬲嬲豬咋，但佢哋唔敢公開講，始終政府好多地區嘢，又要佢哋不時幫拖，「對住豬一樣嘅隊友，仲可以點？」
花生友