一個係宇宙最強嘅甄子丹，一個係前世界重量級拳王泰臣，佢哋最近一齊合作拍攝電影《葉問3》，唔少人都擔心子丹會唔會被泰臣打傷。誰不知早排佢哋拍攝埋身肉搏場面時，泰臣竟然被子丹打到手指骨折，你都咪話唔誇張。
冇人安慰陰功豬
日前電影公司安排探班，泰臣左手食指包住紗布同加咗個承托，被問到傷勢時，佢就好可憐同委屈咁話：「當初你們都只擔心甄子丹會否受傷，沒人想過我安全，現在是我受傷了，都沒有人安慰我。」雖然泰臣受傷，但佢繼續親身上陣，現場工作人都大讚佢夠專業。
講到打傷泰臣，子丹話當日為咗遷就鏡頭，意外批踭撞到泰臣手指，佢話：「拍攝時我知道撞到佢，但冇諗到咁嚴重，大家仲繼續拍，係拍完佢去醫院檢查先知骨折，真係好抱歉。」子丹大讚泰臣又專業又nice，兩個人休息期間仲不時交流拳術心得㖭。
另外，戲裏面扮泰臣夥計嘅譚耀文，開工期間不忘搵偶像泰臣合照留念。而子丹老婆汪詩詩前晚喺個活動度透露子丹想開一套歌舞片，大爆子丹同囡囡不時喺屋企夾歌㖭。
撰文：馮仁昭
