高官同建制派日日喪嗌政改「一定要得」，一班黃絲公務員就身在曹營心在漢，今日凌晨12點喺各區當眼位置掛起黃傘橫額，大大隻字寫住「假普選真呃人」，呼籲市民同泛民唔好信政府袋住先。
呢次行動由幾個公務員同埋公營機構員工發起，佢哋準備咗25條1米乘6米黃色橫額，相信今日各位讀者會喺啲橫跨高速公路嘅行人天橋上見到。
其中一個發起人K仔（化名）同八方講，佢哋主要係一班70後，有啲9.28食過催淚彈，有啲放假先落佔領區幫手，大家對抗爭方式接受程度唔同，但共通點都係反對「袋住先」。K仔話撐唔撐8.31框架唔係政治取向問題，公務員即使政治中立，都唔應該踐踏人權，違反選舉權人人平等呢個普世價值。