袋住先，唔使納稅的人有票投。這算是優惠？
姓吳的大老闆這麼認為。跟他同宗那位L星，肯定老婆一直由阿媽揀，幾千年來都係咁。兩位吳大叔，身邊的吳大嬸由阿媽揀，阿媽今天仍然唔放手，揀晒先，才叫你們五百萬合資格選民揀那2至N個。這五百萬人當中，按吳老闆條數，大部份冇稅交，是梁振英對外國傳媒貶為14K的「好人有限族」。冇稅，有票！雞鴨鵝三人組接口硬銷，你估，一定得？
不，社會嘅工作者，無可能起痰！反之，公佈：通過831，政治免稅！比九月三日關香港人叉事的抗戰勝利政治假期更筍！為了供樓，從熱廚房跳去火坑的打工仔，難免霎時心郁。廣西社團再出手，這次搵年青人的父母拍片，將撐831的民意，盡谷到史上最強的99%！既然阿爺豪擲一億買泛民轉軚的一票行唔通，用吳老闆的duty free思維，博一鋪吧！周字頭的街站即刻轉口配合，簽名代表免稅兼退稅，皇后大道中塞爆西裝友，爭住跟珠姐合照，差點踩死人！