噚日喺上海舉行嘅鑽石田徑聯賽分站，眾多好手都喺參賽名單之中，比賽當然精采。不過，全晚最重要嘅環節，始終係前欄王劉翔嘅榮休儀式，見證佢向「他的跑道他的欄」忍淚say goodbye。
作為今站賽事嘅焦點人物，「劉欄王」一早就被安排坐喺VIP觀眾席，先欣賞吓幾位老對手嘅男子110米跨欄比賽，仲做埋頒獎嘉賓。美中不足嘅係，劉翔今次冇機會將獎牌交到師弟謝文駿手上；三甲分別係跑出最快13秒17嘅奧利華、古巴選手奧迪加同另一位美國名將米列特。
喺退役儀式正式開始前，運動場內大電視播出劉翔多年嚟嘅威水片段，去到2004年雅典奧運以12秒91時間首名衝線嗰幕，全場拍爛手掌歡呼，而佢自己都睇到好感觸。大會亦預備咗記錄劉翔多年嚟重要里程碑嘅幾個巨型數字牌，放喺運動場中央。
「唔捨得嗰10個欄」
接受完表揚自己對中國田徑帶嚟特別貢獻嘅獎座同市長獻花後，終於到劉欄王發言時間。未開口已經眼濕濕嘅佢，話上海除咗係屋企，仲係自己田徑夢想開始嘅地方，所以喺度搞告別儀式好榮幸。跟住就到最催淚嘅感言：「好開心喺度同大家講再見。我唔捨得條跑道同埋嗰10個欄，但更唔捨得喺我嘅人生入面，一直陪伴住我嘅fans。」聽到呢度，唔少觀眾同記者都感動到喊。
一班跨欄選手就出番場，同劉翔一齊繞場一周。班現役選手雖然只係做陪襯，但見到佢哋個樣仲enjoy過劉翔本人，睇嚟大家都好衷心祝福佢。就好似劉翔話齋，祝願大家明天會更好啦！
