皇家馬德里今季失意收場，唔少輿論將責任推去球員度，貴為首席射手嘅基斯坦奴朗拿度都冇得倖免。好多人認為C朗下半季跌Watt，係受到年初同女友艾琳娜分手影響；就喺呢個時候，英國《太陽報》又摷番件事出嚟講，獨家披露艾琳娜一位好友嘅可靠消息，證實係因為C朗太花弗，又周圍撩女，仲成日講大話，先令到艾琳娜心死，決定主動飛起佢。
被揭短訊撩女死唔認
其實之前好多報章傳過，係艾琳娜飛C朗先，但英國《太陽報》今次就講到更加似層層，深入少少講番C朗究竟點負心。根據呢段可靠友人消息，艾琳娜親自同佢講起分手嘅始末，最早係2013年四月，當時報章都有報道，傳C朗同一位叫安達莎嘅巴西名模上過床，艾琳娜因為呢單傳聞走去問C朗，但對方就死口唔認，但兩個月後，C朗走去邁阿密度假，又被影到同啲比堅尼女郎開派對，艾琳娜冇耐就收到一個匿名女人嘅短訊，聲稱同C朗有染；兩個人當然再嘈起上嚟，但最終都係C朗贏，仲令艾琳娜以為自己太多疑。
寧開P唔去首映禮心碎
其後一直有類似情況發生，甚至有次C朗又被小報揭發偷食，但艾琳娜特登喺Twitter幫男友解圍，話嗰晚同C朗晚餐，其實根本就係一張舊相。去到上年八月，艾琳娜參演嘅首部電影《戰神：海格力斯》上畫，但C朗竟然去拉斯維加斯參加派對，都冇去睇首映禮，令艾琳娜好傷心。
慢慢，艾琳娜發現C朗嘅電話入面，經常有匿名號碼，之後發現唔單止全部係女，仲要嚟自五湖四海，葡萄牙、美國、澳洲、法國甚至哥倫比亞都有。艾琳娜正式死心，覺得男友根本唔可信，決定同佢攤牌。友人爆料話：「當時，艾琳娜有再畀C朗機會解釋，但連C朗自己都再冇藉口，於是艾琳娜當晚就離開咗。」
我求大俠睇完呢段獨家爆料後，都幾同情艾琳娜，照咁計，懷疑C朗食女都差唔多兩年，但都忍到今年先離開佢。C朗有名有利又咁靚仔，之前咁都信佢，都唔知係艾琳娜真儍定假儍，只希望𠵱家同荷李活影星畢列谷巴（Bradley Cooper）拍拖嘅佢，可以喺呢段新戀情搵到真愛啦！
識睇，一定係睇足英台【英波Live】：
http://soccer.appledaily.com
http://bit.ly/engballlive