【本報訊】「考試前再加堂幫你溫習，唔會另外收錢……」不少致臻學生的家長對該補習社評價正面，惟外界對該校教學方法有讚有彈。有家長指若學生受不住操練，會覺得如入地獄，亦有家長認為這樣嚴格的授課方式並無不妥。
「視乎自己接唔接受到」
家長阿玲表示，讀初中的女兒自小學起在致臻補習，學科成績曾在一年間由僅僅合格進步至逾80分。阿玲認同補習社的教學方法：「唔會一開始就畀個model answer教你，要你去思考，教到你識為止。」她認為補習社只算嚴格，不算地獄式訓練，「比學校老師更嚴格，因為佢要你哋自律……其實視乎家長同小朋友自己接唔接受到。」她坦言女兒開始時亦吃過苦頭，但發覺補習有效，便繼續下去。
另一家長張太欣賞補習社在學生考試前加堂溫習不另收費，超時也不計錢。她兒子讀中三，補英文及數學，亦由小學開始補習至今。張太稱：「小朋友有人監管佢、逼佢做會好啲，唔聽我講咪畀人教囉，冇辦法。」她不認為補習社教學屬地獄式：「如果佢用地獄式，小朋友會唔願返！」
網上討論區的家長則認為，如此補習方式非人人可受落，聽聞有些同學考試前要朝十晚十操考卷，有時要做到晚上九時才能離開。雖然補習班因有成效致學生爆滿，但亦有家長因小朋友未能適應，最終轉去另一間補習社。
■記者張珮琪、周鴻熙