一場「堅離地」嘅落區騷，高官落區不落車，惹起唔少市民不滿，一幅林鄭離地相仲變咗萬能key，支持政改袋住先嘅民意更一度回落，對要求「一定要得」嘅特區政府嚟講，都咪話唔危險咯！勞工及福利局局長張建宗，似乎都好關心呢班員工嘅「職安健」，擔心高官繼續「堅離地」，好易發生「工業意外」，所以噚日就技術性抽水，以「離地工作要小心」為題撰寫網誌，莫非想呼籲同僚返回地面，先至安全？
對象實為建造業工友
張建宗喺網誌話，如果大家喺高處工作，政府對「安全三寶」係有資助嘅。到底係邊三寶？唔通係可以喺高空中防中蛋嘅「盾牌」、避免撐政改音波功刺穿耳膜嘅「耳塞」，以及慎防烈日下坐開篷巴開工會曬親嘅「太陽油」？點知，竟然冇一樣嘢中囉，因為嗰三寶竟然係流動工作台、梯台同功夫凳，到底同高官落區有乜關係？答案係：冇。
原來張建宗係抽水呃like咋，事關佢欲送上嘅「溫馨提示」，對象係建造業工友，而唔係政總內「堅離地」同事。佢喺網誌話，即使喺一、兩米高跌落嚟都足以致命，所以「必須注意離地工作安全，絕對不能掉以輕心」；而勞工處仲聯同職安局加推「中小企輕便工作台資助計劃」，繼流動工作台外，為中小企提供一次過資助購買合規格嘅梯台同功夫凳。
李八方
mailto:[email protected]