佔領運動過去，香港再不一樣。由中大文化與宗教研究系主辦嘅《雨傘節》藝術展噚日開幕，展期到今個月31號，回顧同反思雨傘運動，向所有曾經參與嘅雨傘人致敬。
展覽展出咗唔少由前線攝影記者拍攝嘅珍貴相片，從激烈嘅警民衝突到靜坐留守，呈現群眾運動無畏無懼嘅一刻，亦有幾位獨立攝影師嘅專題作品，用藝術角度去重塑佔領點滴。展覽期間仲會舉行多場藝術表演，好似話劇、舞蹈同棟篤笑，亦會播放雨傘運動嘅紀錄片。
最近喺YouTube公映《激戰獅子山》嘅學舌鳥成員游學修都有上台發言，佢最近畀網民批評藉學運上位，係「抽水」同「膠化社運」。佢講笑話噚日到場嘅都係左膠，認為路線之爭並無意義，大家只係各司其職。經常喺佔領區獻唱嘅音樂人「香蕉奶」（岑瑋倫）都話，社運光譜中總有做不同事嘅人，「我唔會去批評啲熱血嘅人，大家係要多啲去包容唔同嘅聲音，自己再內戰嘅話唔係一個健康嘅現象」。