有時睇人隔空劍來劍往都幾過癮，講緊係紀惠集團行政總裁湯文亮與資深分析員林一鳴。
湯文亮自從今年2月提出「細價樓三個月內爆煲論」即刻人氣急升，最有趣係林一鳴跟佢唱反調，搞到湯文亮好似唔多高興，繼而開出盤口，話如果今年8月14日，中原指數超越136.64點（上周五係141.37點），佢就輸。
佢日前喺專欄度話，無論輸贏都已經喺福臨門訂咗位，林一鳴肯出席就最好嘞。林一鳴亦即刻有表示，佢噚晚喺自己facebook度話，唔會去福臨門食呢餐飯。
佢解釋，無論佢去或唔去呢個飯局，翌日都會成為新聞，「然後被網民瘋狂轉載，寫上令人不舒服的字句。何苦呢？」照字面睇，林一鳴似係預料湯文亮會輸得好慘咁喎！佢又建議對方，不如取消飯局，將錢捐畀慈善機構，佢亦可以捐出相同金額。唔知湯文亮點接招呢？