上周退任九倉主席嘅吳光正爆料話身邊唔少人都有興趣選特首。查實坊間都一直盛傳，前高官馬時亨都有興趣入閘，睇佢近期舉動頻頻，又難免令人會有此猜想喎。
好似噚日咁吖，肥馬就出席咗香港社區組織協會（SoCO）舉辦嘅專題講座，向在場一班基層貧窮兒童同家長分享草根成長路，重提當年嘅學費都要由舅父相助，先至完成到學業，勉勵在場學生唔好咁易放棄。佢話明白年輕人嘅怨氣，覺得政府都應該為年輕人創造更多機會。既然肥馬現身，有人緊係追問佢係咪選特首啦，肥馬笑笑口否認，重申自己喺特首選戰係「三無」：無意、無計劃同無打算喎。