【鳩嗚乜乜乜】
亞洲萬里通，令人又愛又恨，恨佢難兌換到機票，愛佢其實可以慳好多機票錢。費清最近成功換到機票，而且一票兩地㖭，香港飛東京，玩完再飛首爾，最後返香港。雖然飛兩個地區，都係一張東京或首爾經濟票嘅里數，即係3萬里。
#可飛4個地方
費清都試過香港－台北－東京－香港。由於里數係計行程最遠嘅地方，所以係計東京唔係計台北，即係要3萬里。
其實，亞洲萬里通兌換機票，除咗來往，仲有好多組合，但網上冇得訂，要打電話訂，而且有限制，包括只可以同時有兩次停留、兩次轉機，同一次中斷行程（Open-jaw）。
停留（Stopover）係飛去個城市後逗留超過24小時，如果逗留唔過24小時，只係轉機（Transit）。Open-jaw係去程目的地，同回程起飛地方唔同，即係去城市A，但由城市B走。
舉例，基本來回，如香港－東京（停留）－香港，係一次停留。香港－東京（停留）－首爾（停留）－香港，係兩次停留。甚至可以飛4個地方，例如香港－A（停留）－B（停留）－C（之後自費飛去D，由D返香港，所以呢程係Open-jaw）D－香港。
係咪好複雜？所以最好打電話問清楚，費清只係想提吓大家，下次兌換機票前，不妨諗多個可能性。
費清 ＃要生計，也要生活 ＃毋忘初衷