沙田馬場好似雷神開嘅咁，第四場佢騎東廐「美麗飛翔」影輸做二奶，第五場三班草地1200米馬上贏番蔡廐「首飾太陽」補數，捧走埋十八區盃，「首飾」系馬主董滿輝，亦告打開今季勝門。
跑完上半場，雷神出五駒豪奪三冠一亞一殿，順利大演帽子戲法，三匹頭馬是「福愛寶」、「醒少少」、「首飾太陽」，又再做硬騎師王，今季頭馬增至117場再創新高，雷神威名傳遍全港十八區！
「首飾太陽」賽前操到足，試閘又勁，初出即被捧成3.2倍大熱，11檔起步原本處境不利，不過雷神畀足心機跑，冇耐就攝入內欄慳位，最終11檔變1檔，攞番晒主動權。呢匹蔡廐新貴直路雖一度冇位出兼被撞，但馬有人有之下，臨尾沿欄只衝幾步即一攻而破，最後三、四十米已收韁，擺明係一班馬。而蔡廐三月至今四匹初出澳紐馬，「華恩庭」、「澳斯卡」、「有心人」及「首飾太陽」均全勝。
反為今場二至四名爭到頭崩額裂，柏寶騎落飛次熱「幸運如意」跑第二，大冷門初出自購馬「縱橫大地」第三，「誠信寶駒」衝贏第三熱門「辣得很」得第四，四重彩派一萬四千幾。