Sunday Fever:世事如球賽 - 梁栢堅

Sunday Fever:世事如球賽 - 梁栢堅

上禮拜睇歐聯,見網上朋友好多都未瞓覺,戰況亦非常令人興奮,巴塞隆拿拜仁慕尼黑依然強橫,皇家馬德里由上半場贏再到下半場出局亦為戲碼,唔怪得保方同派路完場時極度亢奮,皆因兩位老將以三十幾歲高齡進入決賽。祖記當日仲被網民揶揄,為四強中至弱旅,奪冠賠率非常好分(九倍),當日有買嘅巴打,有得叫糊都好,即使巴塞係完全屈機。
最近好多朋友講緊一套香港少有嘅體育電影:《全力扣殺》,不過套片仲新,下回再談,今次講番套舊啲嘅,就係上年嘅台灣電影《KANO》(圖)。呢套嘢認真唔簡單,故事講出嚟就似勵志青年棒球電影,話說上世紀三十年代,日治時代嘅台灣嘉義一間豆泥農業學校,由零開始,經訓練之後竟然打到入甲子園決賽。聽到你都話老套啦吓話(廿年前安達充套《Touch》之類)。
但係呢個竟然係真人真事,導演拍攝、剪接、場景全部都有腳法,入面滲咗本土情懷、男人浪漫、反種族歧視等意識,三個鐘絕對唔悶,仲睇到熱血沸騰再流眼淚(利申:我係冷血類),而搞咁多嘢原來大家都係「對自己喜愛嘅運動有最原始激情」。就好似我哋讀書時會狂操籃球、一有時間就踢波一樣,相信可以喺部戲度搵番你自己。
呢一兩年面對咁多荒唐嘢,每場仗大家都努力去打,有啲嘢表面上好似輸咗,但只要唔放棄,永遠有機會有奇蹟,世事如球賽。

梁栢堅
填詞人+彩池人