雷神由第二場開始，每贏一場破一次香港紀錄，去到第六場四班千六米佢憑1.9倍大熱門沈廐「曦世之寶」，勝出個人今季第118場頭馬，截至此場這天他已憑「福愛寶」、「醒少少」、「首飾太陽」及「曦世之寶」四喜臨門，幫周日返「娘家」新加坡客串大壯聲威。
雷神完全當其他騎師冇到，「曦世之寶」同廐侶第四場「阿甘」一樣，都係贏完再贏同一班次及路程，唔同嘅只係後駒用潘頓擊敗雷神之「美麗飛翔」，而「曦世之寶」則輕取潘頓座騎「贏男」，兩人跑完前六場已經三度包Q，攤路係咁冇得拗氣！
講番「曦世之寶」，呢鋪孭133頂磅跑落唔覺吃力，有賴雷神留放精妙，拉士從外欄一衝過晒，順風順水完成三連捷，馬主李澄曜賽後拖男帶女拉頭馬，當然唔少得佢靚靚老婆凱倫，凱倫仲抱埋B女揚威凱旋門；廐主沈集成亦笑到見牙唔見眼，皆因單一個雷神，季內已經幫佢掃咗9win，騎練合作妙到毫癲！
此場二至四名順序「贏男」、「耀華盛甲」及「駕翠」，四重彩只派5,461元。