我主場：凍齡海味　挑機封胸霸權

已將工作重心轉往內地，定居北京12年的周海媚（海味），外表柔弱沒有殺傷力，是80年代無數男士的愛美神。不過，海味在耗資三億元製作的內地劇《武則天》忽然突破玩谷胸，「爆乳」連場令人看得熱血沸騰。可惜逼爆上圍最終慘被封胸，難得48歲的海味依然保持嫩肌兼白滑，成功吸睛；更被網民賜予「凍齡女神」美譽，演技亦贏盡掌聲。
撰文：鄉奈仁

周海媚在內地劇《武則天》有突破演出，更獲封「凍齡女神」，她笑言要感激網民抬舉。
攝影：林德雄

【封胸版】
香港版《武則天》全部加banner封胸，台灣觀眾才能一飽眼福欣賞「群妃爆乳版」。

【爆乳版】
海味演的楊淑妃不但白嫩吸睛，谷胸爆乳也叫人鼻血長流。

周海媚85年參選港姐後晉身娛樂圈，現年48歲的她被讚「凍齡」不老，在內地劇《武則天》跟33歲范冰冰及28歲張馨予等女星爭妍鬥艷，谷胸爆乳鬥性感亦毫不遜色。可惜除了內地要播只剩膊頭以上的「大頭娃娃版」，香港亦只能播乳溝盡失的「banner封胸版」。海味日前接受本報專訪時說：「我冇睇香港版，但我知道係封咗胸，其實我都唔明點解接受唔到，呢個係歷史，好多朋友都同我講想睇有胸版本，啲衫好靚。不過冇辦法，好似呢個係內地賣埠嘅準則。」

獲網民激讚演技

《武則天》由上月底開始，於黃金時段播足七晚，有指一台獨大，觀眾「硬食」冇得揀，問海味點睇？她說：「或者可以好似內地咁，受歡迎嘅劇一個星期播三日，每次播兩集，我覺得咁樣都幾好，觀眾可以多啲選擇，劇迷又唔使七日坐定定冇得出街。」
多年來，海味常演斯文溫柔的角色，今次演繹心機算盡的楊淑妃，網民激讚演技贏盡眾女，包括有份投資兼演女主角的范冰冰，海味即時雙手合十謙稱：「係感情分箒！個個演員都好好，冰冰個角色好多變化，好好睇。不過，劇本真係冇描述楊淑妃嘅性格，係我自己用自己方法去演，都幾大挑戰。」

首次與范冰冰（中）合作拍劇，海味大讚對方戲好，亦看好李治廷。資料圖片

開設工作室圓夢

今年是海味入行30周年，為慶祝這個滿載回憶的數字，海味不惜豪花七位數字推出非賣品EP，又專程到韓國拍MV，不過最大的計劃莫過於她今年圓夢開設工作室，海味說：「工作室會投資電影、電視劇，但𠵱家好多嘢都係初步，我仲有經理人合約，將來都會同𠵱家經理人傾合作，工作室冇可能一個人做得晒，會同唔同人合作。」
做足30年，問海味何不享受生活，給自己多點時間拍拖？她笑謂：「開工作室就係享受生活，我好鍾意做幕後，有時會攞啲劇本自己改對白，對呢方面好有興趣。雖然鍾意做幕後，但我一定唔會放棄幕前工作。」海味又自爆性格男仔頭，永遠坐唔定，她笑說：「我個樣呃人㗎咋！其實我好男仔頭，細個成日打交，𠵱家都坐唔定，同埋鍾意試新嘢，越係唔識就越想試。」
「當年啱啱去北京拍劇，普通話唔得，我就逐個字問導演點讀，問到佢都唔想答，叫我講番廣東話，反正都會再配音，但我死都唔肯，因為唔講就一世唔識，同埋我覺得做演員要有誠意，亦要尊重對手，因為自己講廣東話，人哋聽唔明投入唔到，就係我嘅問題。」
場地提供：LALA CURIO