話說方展博俾師傅葉天係咁打頭，因為佢答極都答唔到股票係乜嘢？結果喺未扑暈之前葉天自答：「股票係人嘅遊戲！明冇？」其實《大時代》唔係講股票，問人有冇火亦唔係為咗點煙 。
去睇《全力扣殺》，諗住睇羽毛球，一開場就介紹女主角係全港七屆羽毛球冠軍，仲以為係歌頌陳念慈或者係黑妹，點知睇落係冇關係嘅，套戲真正主角原來係爆肚露pat pat嘅林敏聰；全套戲最搶嘅金句出自佢把口，當大師含住口煙問「有冇火呀？」「冇喎。」「吓？做人冇火點得㗎？」戲入面嘅風頭就俾佢攞晒。係，當一句對白令你有feel，叮一聲醒咗咁，咁句對白就唔再係對白，而係可以放上fb分享嘅金句嘞。
咁話時話，Amy同黑妹如果去咗睇《全力扣殺》，會唔會睇完黑晒面呢？因為套戲入面其實打嘅波同真實場面都距離幾遠，旨在借個羽毛波嚟講下人情冷暖高山低谷箒，我哋啲門外漢睇得眉飛色舞㗎，之不過若果俾Amy睇見大師竟然踢拖入場打波，再聽埋一大堆順滑流暢嘅粗口之後，恐怕會好似大師清醒前咁嘔唔停。
套戲係2B級，兒童同青年可以睇，但最好有家長陪同，不妨加多個建議：運動員可以睇。但最好有講得笑嘅朋友陪同，然後唔好當佢係運動電影嚟睇，而係一套有少少勵志嘅喜劇咁睇，咁就應該可以食晒成杯爆谷嘅。我當年其實曾經瀨嘢，懶興奮咁去睇套足球電影，點不知原來係科幻片，套戲最後嗰幕一球射波竟然可以摧毀咗成個球場，當時我同戲中嘅正牌謝老四一樣，頹晒咁攤咗喺個位度，好似心愛嘅玩具俾人搶咗再整爛咁冇癮。不過最變態嘅係，家陣無論幾時重播《少林足球》，我都仍然會停低，然後一齊背台詞。因為一段時間之後，我接受咗呢套戲「笨」唔係運動電影，而係哲學電影，咁蹺個道具叫做足球箒，舒服晒。
睇咗一本日本小說《晴空下與你一起狂奔》，講六個初中生跑接力賽，300頁就係講一場比賽，入面冇講跑步技術亦冇金句，但有故事，其實都係借跑步講吓青蔥歲月嘅少年情懷，睇完刺激咗我諗番當年淨係識緊張勝負，輸好贏好都冇諗過背後有咩意思。所以當睇到書入面每個跑手，分別係為咗友情同感情而去努力嘅時候，望吓自己，家陣營營役役又係為乜呢？嗱！好似方展博係咁狂炒股票，你估佢又淨係想發達咁簡單咩？
KEYMAN
節目主持
電郵：[email protected]