剛過去嘅母親節，卓林未有陪媽媽吳綺莉一同慶祝，母女關係，時而緊張，時而親密。接下來一個星期，兩母女仲會分隔兩地，因為卓林隨學校參加瑞士遊學團。
昨晚卓林獨自一人推住行李，一個大袋，心口掛住部相機，現身機場準備check in。卓林甫見咁多記者，自是緊張不已，連跑幾步，掩面疾走。
及後卓林終於站定，並用英語謂這是其私人空間，之後亦願意受訪。談及與母親關係，她謂:「關係無嘢，幾好。」咁母親有冇叫佢去到外地要小心啲？卓林就話:「做媽咪梗係會叫個女小心啲。」
過了一會，卓林再受訪，表示此行到瑞士一個星期。記者問她可知昨日有外國網站亂傳成龍死訊？卓林說:「我唔知，我唔睇呢啲，冇聽過呢啲消息。」
日前有周刊報道指，卓林就讀之國際學校因為有感於吳綺莉「太麻煩」，故要求卓林下學年度退學轉校。記者問卓林考完試了嗎？她謂:「未考完。」是否繼繽在港讀書？卓林說:「Yes，學校冇嘢，我讀書嗰度都冇嘢。」但有傳校方要求你轉校，卓林就表示:「呢啲嘢我唔答得。」
卓林謂同學都很關心她，又說:「佢哋知道我會take care自己。」至於瑞士此行有何計劃？她笑道:「去玩囉!學校有行程俾我哋。」會否趁機視察環境、看看當地是否適合留學？卓林說:「唔係唔係視察環境，真係唔係，只係覺瑞士靚，想去玩。」那稍後會否與母親孖咇同遊？卓林話:「呢個要問媽咪，因佢要做嘢，未知啲時間。」
卓林又承認確有打算與母親一齊暑假教畫畫，談到母女現時關係，卓林說:「媽咪ok。」有冇探婆婆？「我最近冇聽過婆婆嘅嘢，佢冇嘢，依家喺上海。」至於補祝母親節，卓林表示:「都會，睇下到時點。」之後卓林會合老師和同學，又買咖啡飲，準備辦理登機手續。