踏入球季最後階段，各地聯賽啲賽果都特別難估，以往頭尾對賽，間中都聽到，話可能會就一就，但今年嘅英超又真係少咗呢支歌仔唱；好似今晚熱刺對侯城，咁你話點就？雖然你話侯城要爭分護級，但佢都話熱刺要爭歐洲賽嘅參戰資格。
熱刺已經三場不勝，但係爛船都有三斤釘，翼鋒查迪尼近四場都入咗兩球，大紅人哈利卡尼（圖）亦都有一球進賬，兩班波實力始終都係有些少距離，所以今晚熱刺讓半/一，上盤都要得過。
另外歐洲波難玩，所以向大家預早推介場亞冠盃，就係星期二場全北汽車對北京國安。呢場係北京個幾星期內第四場波；亞洲球隊打三條戰線真係冇乜可能，周中球證幫到出晒面，完場前送兩球先贏到深圳，騎呢到飛起，周末又要砌有港腳科夫嘅遼寧，面對全北着晒火嘅射手李東國同艾連奴，就算你係鐵打都死得，我諗去到下半場行都有問題，放心玩吓。
講開季尾波升降資格肉緊，今年港甲爭升班上超聯嘅戰情亦十分之激烈，話說早前足總經已問晒邊間球會有意升班，亦同佢哋跟進晒申請超聯牌照手續，不過有球隊唔知係唔係一早通晒天為下屆組班消息，搞到班升班功臣無晒精神，狀態突然跌晒，臨季尾先輸畀爭升班對手，即時由主動變成十分之被動，所以話有啲嘢都真係低調啲好，連教練都飛埋，唔同你玩，就死囉！
本地職業領隊
耳聽八方 專收好料