立法會主席曾鈺成聽日就68歲生日，一班立法會議員噚日趁大會開完，率先為曾主席慶祝，準備咗個寫上阿曾英文名「JASPER」的生果蛋糕，同購自油麻地果欄的提子同阿曾慶祝，不過曾主席對佢有乜生日願望就神神秘秘，話唔講得，怕講咗唔靈，反而挑起八方同一眾議員好奇心。
話說不同政見黨派立會議員，噚日都暫時休戰，畀面抽空出席曾主席生日會，包括白鴿黨主席卿姐、公民黨黨魁傑哥、工黨主席阿人等，但最特別都要數民記請來的特別嘉賓，就係阿曾老婆曾太。
笑笑口話唔係當選特首
戴上眼鏡後嘅曾太噚日一現身，有立會職員即刻話佢有幾分似息影藝人王愛明，其間曾太一直表現怕醜，唔肯接受訪問，傳媒問親乜都只係回應：「你問佢（曾鈺成）啦！ 唔好意思啊。」
生日會主持、民建聯漁農界議員何俊賢就話，噚日曾太到場，就係想請「正印」錫阿曾一啖，又話若然曾太不就範，佢惟有自我犧牲咀阿曾，不過何俊賢口中，曾主席個「正印」之外嘅人，究竟係邊個？何俊賢始終冇講喎，不過曾太為「捍衞主權」，最終上前攬咗曾主席一下當交貨。
咁一眾議員梗係關心主席有乜生日願望，曾主席就話係「四個字」，但怕講咗唔靈，所以點都唔肯透露，有記者打蛇隨棍上，追問係咪「當選特首」？曾主席即笑笑口話一定唔包括呢個在內。
佢又話收到太太的「貼身」禮物，但又係唔肯講係乜，只笑住話希望將來用時，到時記者會睇到。
李八方
mailto:[email protected]
