後日就係「國際不再恐同日」，非牟利機構「社商賢匯」噚日公佈首屆香港職場共融指數同埋香港十大同志共融僱主，排頭3位分別係高盛集團、匯豐銀行同摩根大通；上年被反同勢力瘋狂打壓既小童群益會「性向無限計劃」，獲最具影響力同志共融社區項目大獎。
小童群益會攞獎
喺參與嘅35間企業入面，只得3間本地公司，以100分為滿分，35間企業平均分只係42.8分，仲有好大進步空間。至於得到大獎嘅小童群益會，係少數服務不同性傾向青年同埋佢哋家長嘅社福機構，但正正因為咁，去年5月一群反同人士瘋狂攻擊佢哋，好彩有社工界企出嚟發動千人聯署，加上機構夠硬淨先頂得住。負責計劃嘅社工周峻任就話，之前機構承受好大壓力，但會堅持信念，支持弱勢社群。如果大家都想關心性小眾既權利，聽日下午2點至5點，銅鑼灣東角道行人專用區有國際不再恐同日行動，今年主題係同志家暴。詳情可睇網址： http://www.idahohk.org。