香港田徑隊每年出戰台北都有斬獲，噚日大軍展開中華台北國際邀請賽征途，首日就有鏈球猛將林瑋超班摘金，更加同跑界新星陳嘉駿分別打破香港紀錄，認真威水！
港隊今屆派出一行32人出征台北，第一日有林瑋喺男子鏈球決賽登場，雖然呢位大力士頭兩擲被foul，但之後擲出65米14輕鬆摘金，成績唔單止拋離亞軍嘅東道主選手兩米有多，更加打破自己喺2013年創下嘅63米87香港紀錄。
唔止田項有好成績，近年彈起嘅跑手陳嘉駿喺男子400米初賽跑出47秒28，以0.06秒之差刷新自己保持嘅港績，可惜夜晚決賽只跑出47秒85得梗頸四。不過，佢今日仲會轉戰400米跨欄初賽；而香港男子4x100米接力隊噚晚亦以小組首名晉身今晚嘅決賽，都有望再為港添牌。