喺現時香港馬圈，唔少馬主都娶咗個靚靚年輕老婆，隨便數一數，有「星運武士」游紹賢太太、「龍華太旨」謝劍汶嘅台灣嬌妻、「辣得醒」吳少庭嘅另一半等。當然唔可以數漏嘅，就係「曦世之寶」馬主李澄曜太太凱倫啦！
凱倫公認有氣質，佢同李澄曜成日拍拖入馬場晒恩愛。大家咪睇李澄曜外貌老實型，以為佢唔夠浪漫，原來佢曾經以20萬，投得女星舒淇所寫嘅「不再讓你孤單」提字送畀老婆，連愛駒亦命名為「凱倫之寶」，真係廿四孝老公咯。
可惜上季兩捷嘅「凱倫之寶」，今季跑落冇乜進步，最叻季初得第二，近兩仗更大敗。好彩「曦世之寶」非常生性，前仗初配雷神即力拼打開勝門，上場加分加磅再出，居然贏得更易，三歲年輕馬潛力深不可測；隻馬周六(16日)賽事將再出，班次路程配搭不變，由雷神試埋大閘先跑，備戰有誠意，仲要抽個靚靚二檔，睇嚟李澄曜夫婦，又可以拍拖拉頭馬。