舊年已多次休假嘅梁振英，噚日又透過特首辦，突然宣佈由今日至本月25日起離港休假10天，其間政務司司長林鄭月娥將署理行政長官職務。
八方翻查紀錄，梁振英唔止舊年已多次要休假，今年2月其實都休假約7日，不過當中計埋周六、日同公眾假期，算唔算放得密就見仁見智，但同番7-11嘅前特首董建華嚟講，就梗係放假放得密！
至於佢會去邊？有特首身邊人話相信係去「好遠嘅地方，唔係唔使放成10日假！」
梁振英放假前，噚日靜雞雞去咗保普選反暴力大聯盟嘅街站度簽名，但政府新聞處連張稿都冇出，只係登咗兩幅相出嚟就算，最好嘢嘅係簽名嗰張相只係影到梁振英側面（圖），而且連梁振英幾點鐘簽、喺邊度嘅街站簽都唔講，另一張就係梁振英同啲市民合照。