今輪英超除咗係謝拉特主場告別嘅大日子外，明晚尾場「雙紅會」曼聯迎阿仙奴嘅前列名次戰，係今季煞科前最強戲碼；雖然「兩紅」唔係大勇，但屬性主攻，隊內前鋒為保來季飯碗必打醒精神，今場波唔估勝負，但入球「大」幾穩，「總入球」三或四球博得過。
球季未完，大局已定，轉會新聞漸多，車仔簽入巴西神奇小子尼敦阿倫；而曼聯嘅雲高爾亦怕被巴黎聖日耳門截糊，用超過3,000萬鎊購荷蘭「契仔」迪比，又話要撬熱刺新星哈利卡尼；咁麾下三大貴價鋒將迪馬利亞、法卡奧同尹佩斯點算？明晚大戰，有得出必搏甩髀。
曼聯今晚對手阿仙奴，坐三望最後排到第二，以領隊雲格嗜攻嘅性格，最緊張仲係來季多簽一位優質中鋒；超過一個月冇波入嘅基奧特（圖），抵用但唔係頂級之才，大戰多隱形。上次兩軍喺奧脫福嘅英足盃碰頭，雲格改用韋碧克倒戈，反而見效，並成致勝功臣，可惜今仗因傷缺陣；基奧特來季要保住一號中鋒位，餘下連英足盃決賽四場波，要加把勁。未續約嘅禾確特，傷後苦操多月仍未在勇境，但上仗阿仙奴主場竟負史雲斯一役，艾朗藍斯續演右中場，速度輸蝕，要變用禾仔踢回最擅長右翼，又可幫到新仔比利連，牽制紅魔左路側擊極強嘅艾舒利楊格。事實上，阿仙奴今季全季只曾在去年11月試過連敗，作客強隊反有空間打突擊，今場平手盤高水，可小敲。
當然阿仙奴最怕嘅紅魔兵，仲係朗尼；後者除喺愛華頓初出道射爆當時把關嘅施文十指關外，效力紅魔第11個球季，已12次攻破兵工廠大門，今季12個聯賽入波有11球喺主場取得；加埋費蘭尼嘅高空轟炸，曼聯要延續近五季主場聯賽鬥阿仙奴必入波不難，今場重點博入球「大」外，今季雙方兩次交手俱開三球，可以連「總入球」四球一併兼顧。
另外，修咸頓主場謝幕鬥近期特勁嘅阿士東維拉，後者形勢上差不多夠分上岸，上仗迎韋斯咸險勝已見銳勢稍減；相反修咸頓主場踢高好多，近四戰三勝一和外，今季10場聯賽主場勝仗有七次開到[-1]，可冷敲。至於榜尾大戰，紐卡素作客讓篤定降班嘅昆士柏平/半，要贏保命，博上盤。
波神
神級攻略 智破足彩