周四歐霸盃四強次回合，烏克蘭球隊迪尼普憑前鋒施連洛夫一箭定江山，主場1:0擊敗拿玻里，兩回合合計迪尼普贏2:1，歷史性躋身歐霸盃決賽，賽後成班「粉絲」梗係衝晒落球場狂歡慶祝啦。相反，由「盃賽專家」賓尼迪斯（小圖）領軍嘅意甲勁旅拿玻里，宣佈衝冠失敗之後，睇嚟賓帥都好大機會喺季尾後離隊。
迪尼普喺今個月27號決賽嘅對手，將會係爭取四奪冠軍嘅西維爾；西維爾喺四強次回合，有卡路士巴卡同丹尼爾卡列高各入一球，作客2:0輕取費倫天拿，兩回合合計以5:0大勝對手殺入決賽。
論經驗同實力，力爭衞冕、兼曾經奪得2006及2007年歐洲足協盃冠軍（歐霸盃前身）嘅西維爾當然佔優，而以今屆歐霸盃嘅表現嚟講，西維爾贏咗10場射入26球，亦較迪尼普贏七場同射入15球優勝；不過，迪尼普今屆一路過關斬將，越戰越勇，就睇吓佢哋今屆喺波蘭首都華沙舉行嘅決賽，能否再創歷史，首度捧走歐霸盃啦。另外，由於歐霸盃冠軍可以踢下屆歐聯，所以西維爾同迪尼普到時肯定會搏老命。
識睇，一定係睇足英台【英波Live】：
http://soccer.appledaily.com
http://bit.ly/engballlive