浪子詞人潘源良（潘sir）磨劍半生，筆下寫盡世間的情和愛，歌詞夭心夭肺十分到肉，20多歲開始填詞的他，自覺是一個很早熟的人，對自己的作品有要求，絕不能失禮於人。初入行憑《邁步向前》火速上位，曾經在詞壇叱咤一時的潘源良，97年後以為廣東歌是夕陽工業，毅然轉做講波佬，作品由高峯期一年近50首跌到不足5首：「我都試過坐喺屋企冇得寫！」經歷過30年來高低起跌，下月他雲集一眾巨星，舉行他首次個人作品展。
撰文：余燕儀
現年55歲的浪子詞人潘源良擅寫情歌，原來很多巨星的第一首hit歌，都是出自他的筆下，如王菲《容易受傷的女人》、張學友《情已逝》、林憶蓮《愛情I don't know》等，在中大新聞系畢業的他，歌詞寫情愛超到肉，如果感情上沒有經歷過滄海桑田，怎可以寫到夭心夭肺的歌詞，潘Sir說：「我係一個好早熟嘅人，對作品有要求，難聽啲講唔好失禮人，寫出嚟唔會好幼稚，人哋聽到攞嚟笑，或者唔到肉離題萬丈，自己會唔鍾意。」
「坐喺屋企冇得寫」
狂傲如潘源良，20多歲開始寫歌，他說：「寫到有啲人覺得：『咦！呢個人係咪好老？』我諗我個人老積，有時未必太好，好似冇咗童真，𠵱家叫我寫兒歌死梗，完全搞唔掂，後生時寫埋啲好老積、大膽題目，自己希望世界觀會闊啲，同人溝通就可以多啲層次，如果要經過晒大起大跌去寫，好快會乾塘。我寫歌習慣就係先聽首歌，畀到乜嘢想像，所以我成日講文人多大話係真嘅，我哋未必真係經歷過，但要寫到好似真係經歷過，否則你係失敗！」
曾當助理編導的潘Sir，當年曾為港台《溫馨集》寫主題曲《濁世暖流清》，他說：「寫完之後靜咗落嚟冇乜動靜，過咗一年後轉去新藝城拍電影《英倫琵琶》，又走去寫主題曲，識咗阿Lam（林子祥）寫《邁步向前》，開始又識埋泰迪羅賓，佢細佬（關維麟）喺寶麗金做監製，結果好好運畀歌我寫《愛情陷阱》，寫完後其他歌手、唱片公司、監製都搵我寫歌。」
潘Sir的作品好快已一炮而紅，填詞生涯上似乎沒捱過苦，他笑說：「又唔好咁講，我都試過坐喺屋企冇得寫嘅時候，我都冇辦法，我係被動㗎，90年代尾，自己諗可能廣東歌係夕陽工業，大家都知97前後大陸逐步開放市場，睇到無論香港、台灣，好多大歌手去大陸發展，我覺得大陸人雖然有聽廣東歌，但主要語言係國語，歌手上去多數唱普通話，如果佢哋要寫普通話嘅歌，台灣人又寫得，內地邊個都可以創作，佢哋唔使搵我寫普通話歌，廣東歌市場收縮時候，可能冇乜嘢寫。」
危機意識迫轉行
未雨綢繆的潘Sir思索下一步的路，他說：「嗰時開始諗係咪有其他嘢做呢？啱啱收費電視引入直播足球吸引觀眾，因緣際會轉去講波，都係自己鍾意而又有市場嘅行業，只不過後嚟廣東歌原來仲有市場，但填詞人方面新人冒起，變咗我越寫越少，有人以為我轉行去講波，唔搵我寫歌詞！幾十年都係冇固定行業，入息長期唔固定，自己好有危機意識，呢樣自己係咪做到？嗰樣係咪值得全心投入？有個年代電影方面，啲人可能覺得我嘅劇本唔夠商業化，我嘅整體表現唔可以幫到佢賺錢，佢哋可能唔搵我寫劇本，咁我都會等一等，睇吓有冇時機多啲機會創作，我覺得自己都係分輕重處理事業。」
潘Sir在事業上權衡輕重，感情上卻波折重重，86年為電影《最愛》寫下《最愛是誰》，這年他戀上李麗珍，跟結婚3年的太太離婚，回復單身後卻沒與李麗珍來往，直至8年前才復合，歌詞「為何離別了 卻願再相隨 為何能共對 又平淡似水」仿似度身訂做，他無奈說：「你哋覺得我係潛意識寫呢首歌詞，我就冇得解釋，其實成件事係一個巧合，咁蹺有《最愛》呢部電影講呢種關係，需要主題曲去描畫，寫完後或者叫巧合，有事發生喺自己婚姻上，之後隻歌又紅咗，大家對號入座。」
場地：Table 18 at apm
