自五月五日本欄刊出「本欄倒數」之後，引來不少網上留言，「蘋果」又轉送來大量讀者電郵，除咗一兩個大罵左丁山為地產霸權幫兇，早走早着之外，其他都表示唔捨得，七月一號之後有失落之意，謹在這裏多謝咁多長期讀者鼓勵。又有一封三頁紙手寫來函，呢位讀者話自己在2015年底有資格攞生果金，壹週刊、蘋果日報自創辦第一日開始，佢一路訂閱至今，睇「蘋果」就一定先睇副刊。故此知道本欄在六月三十日係最後一篇後，佢頓生失落感，焦慮不安。呢位讀者又講佢童年住在深水埗近桂林街，知道有新亞書院，佢有一位同學話讀過新亞小學，問新亞曾否辦小學？
新亞未曾辦過小學（現於農圃道有新亞中學），但五十年代初，新亞書院學生曾在深水埗開辦義學，因當時街上貧童太多，又冇書讀，所以好窮嘅新亞學生就在唐樓天台辦過小學義學，教育好窮嘅小孩，為期不長，可能因為咁，讀者嘅同學就話佢曾經上過新亞小學。
記者G出席記協周年晚會，與地產及金融界人士坐埋一枱，佢話全晚令佢印象深刻之事，係財爺曾俊華在台上致辭時，大搞棟篤笑，自嘲自諷，單打埋高官及「白宮發言人」，比起以前出席晚會嘅特首、政務司司長板起面孔演講，稱讚傳媒、聲言支持言論自由呢類門面話，有娛樂性得多。
曾司長曾讀MIT與哈佛，一定知道美國白宮主人每年一次出席National Press Club晚會，按傳統大講笑話，當一晚牙擦蘇Letterman，以語言玩笑，嘲諷自己、議員與政府政策，每年都講得十分精彩，係華府每年一度政壇報壇傳媒界盛事，各方敵對政治勢力，喺呢一晚都化敵為友，一笑泯恩仇，第二日又嚟鬥個你死我活。香港高官之中，曾俊華最有資格做呢樣嘢，明年記協不如繼續請曾司長出席，事先協定做一場「白宮式棟篤笑」，預先編定劇本，再加司長臨場爆肚！有此節目，記協晚會勢必一早賣清光所有餐票，唔駛周圍撲，搵人贊助。香港政壇太過缺乏幽默感，每年搵一晚玩吓都得啩？記者G又講到是晚不少人講及左丁山六月三十日之後停寫「GG細語」一事，陰謀論滿天飛，完全唔信因為稿酬重整係原因。唔信就唔信啦，講多無謂，香港係陰謀論充斥嘅城市，總之各取所需可也。