當人人以為有天后容祖兒做女友會壓力很大，劉浩龍卻說：「沒有。」當人人以為紅歌唔紅人會鬱鬱不得志，劉浩龍依然說：「沒有。」以為他是要面子死撐，劉浩龍輕鬆說：「其實我份人好樂觀，從來冇覺得自己慘。」日前他接受本報專訪，公開多謝女友容祖兒令自己改變：「佢令我有團火升咗，又冚熄我另一團火！」
撰文：余燕儀
現年38歲的劉浩龍（師兄）在圈中打拼18年，雖然有幾首耳熟能詳的歌曲《爛命鴛鴦》、《髒話阿七》、《神啊！求求讓我睡》，但都不及近年有一個天后女友容祖兒，令他由二線歌手變頭條藝人，問他鍾意祖兒甚麼？師兄坦言：「好似我咁正能量，佢再影響咗我㖭，令到我個人積極、正面、真心，呢樣係我喺佢身上學到，以前好多顧慮，擔心人哋點睇我，𠵱家我覺得如果我真心對你，起碼我對得住自己，真係唔可以理咁多人哋嘅想法，冇可能全世界鍾意你。」
「冇同祖兒嗌過交」
要追天后做女友，行動前是否很多顧慮？師兄笑說：「冇呀，好自自然然開始，冇乜刻意攻勢，我哋識咗好多年，溝通得舒服咪自然一齊囉。」不介意被批評女尊男卑？他說：「冇呀，做娛樂圈預咗係咁，如果介意，每一日都會過得好痛苦，最緊要伴侶知道你做緊乜，咁就夠啦，我哋一次都冇嗌過交，所以咪話真係溝通得好好。」
師兄不覺得有個天后女友壓力大，更公開多謝祖兒：「多謝佢令我做嘢團火升咗，又教我同人溝通好啲，放開自己包袱、真心啲，亦幫我冚熄另一團火，就係怒火，以前對好多嘢唔妥協，覺得唔公平，𠵱家學識包容，啲人話我個樣唔同咗，可能就係冇咗𤷪𤺧、火爆。」
今年師兄轉新公司太陽娛樂，早前開了音樂會，暑假又會推出新唱片，坦言曾擔心大家忘記他是歌手：「我想話番畀大家知，劉浩龍入咗新公司，除咗係演員之外，都係一個全職歌手。」
「想大紅大紫冇用」
覺得自己的歌手路難行？師兄說：「贏新秀嗰時得20歲，每個月一千蚊人工，嗰時食公仔麵唔覺辛苦，𠵱家諗番仍然覺得係好寶貴日子，其實我份人好樂觀，啲人誤會咗，可能聽我嘅歌覺得我好慘，但我從來冇覺得自己慘，一直冇擔心過。由細到大唔鍾意同人比較，唱歌做戲有進步就OK，亦唔係用獎項嚟比拼。」
問師兄怎樣看待自己的事業？他笑說：「幾好呀，到𠵱家都未俾人淘汰又照顧到自己，唔使好似以前一千蚊一個月憂柴憂米，想大紅大紫冇用，要好多嘢配合，最緊要裝備好自己，冇間斷拍戲唱歌，比好多人好幸運。」
【圈中多交心朋友】
劉浩龍其實很富有，他的富有不在於金錢，而是有多位能夠交心的圈中好友，他說：「陳奕迅、謝霆鋒、梁漢文、谷德昭……我哋好鍾意握手擁抱，男人老狗唔使講出嚟，咁樣已經係鼓勵。我以前覺得自己做得唔夠好，開騷從來冇叫朋友嚟睇，今次主動畀電話叫佢嚟睇，見證自己成長。」
電影方面師兄最想多謝吳君如給他機會拍《金鴨》，他說：「我係一個歡樂嘅人，需要一個角色將呢一面帶畀大家認識，喺佢身上學到拍喜劇都要做足功夫，佢又係獅子座，令成個team好好，未試過拍戲因為冇得過聖誕，佢叫咗龍蝦、牛扒、鮑魚、香檳到會，抽禮物人人有份，呢個係好好榜樣，佢真係好好領袖。」
髮型：Jay Yeung@Private I
化妝：Kei Kei Ng
服裝：Harmont & Blaine,7 For All Mankind
場地：Hooray Bar & Restaurant