疑因落區期間爆seed令民望下跌嘅食物及衞生局局長高永文，噚日出席賽馬會同港大合辦嘅「愛+人」計劃活動時被記者重提傷心事，問佢有無後悔落區令民望跌9個百分點。民望高話唔後悔，因為係問責團隊一員，如再有落區計劃都會繼續參與，爭取同市民直接對話嘅機會。
而各大團體逢請必到嘅民望高，日日跑幾場一定忙到甩轆，佢噚日都話較難抽時間做運動，但都即場示範一項「零時間運動」，就係坐喺凳上落力踩空氣單車，同場仲有名醫林大慶同馬會副主席周永健一齊宣傳健康訊息。
民望高致辭時提到政府成立由陳智思出任主席嘅「降低食物中的鹽和糖委員會」，點知連佢都講錯咗委員會名稱，之後笑笑口話：「個名比較難記，我都成日講錯。」