三間大學就政改進行滾動民調，日前一度出現支持、反對政改方案比率收窄到3個百分點，點知成日叫泛民尊重民意嘅保普選反暴力大聯盟發言人周融，卻話調查取樣1,000人，結果未必可以代表700萬港人喎。此說一出建制派都頂唔順，皆因建制政黨、政團都唔知做過幾多次民調，有啲樣本得幾百個咋。
噚日有唔少富二代成員嘅香港青年聯會就公佈政改民調，抽樣1,075人，近55%受訪青年認為立法會要通過政改方案，佢哋梗係叫泛民跟民意投票啦。八方反問，周融話千人民調唔代表所有人喎？身為常務副會長嘅范駿華，即係全國人大常委范徐麗泰囝囝就話，民調係學術產物，冇可能問晒700萬人，隨機抽樣全世界都咁做啦。至於周融點解咁睇？「你問番佢，我唔識答。」