核心區舖位租金雖然跌緊，但由賭王四太梁安琪持有嘅尖沙嘴加連威老道巨舖，就啱啱以月租73.5萬元租畀女性內衣店6IXTY 8IGHT，比四太叫租仲要高出5%。
個舖位於加連威老道38至40號華暉大廈地下B舖，大約4,200方呎，現租客仲係蘋果產品專賣店Studio A，由2010年開始租，近年每逢有蘋果新產品推出，一班「果粉」都喺門外大排長龍搶購。
個舖𠵱家月租約50萬元，租約今年到期，四太上月開始以70萬元放租，竟然喺短時間內租出。
新租客係呢幾年擴充幾快、一向以粉紅色做舖面設計嘅6IXTY 8IGHT，佢哋喺香港逾十間分店清一色喺商場，今次租四太個舖可以話係衝出商場，唔怪得出手咁闊綽啦！